רש"י על ירמיהו מ״ה

« רש"י על ירמיהו מ״ד:ל׳ רש"י על ירמיהו מ״ו:ג׳ »

1 הַדָּבָ֗ר אֲשֶׁ֤ר דִּבֶּר֙ יִרְמְיָ֣הוּ הַנָּבִ֔יא אֶל־בָּר֖וּךְ בֶּן־נֵרִיָּ֑ה בְּכׇתְבוֹ֩ אֶת־הַדְּבָרִ֨ים הָאֵ֤לֶּה עַל־סֵ֙פֶר֙ מִפִּ֣י יִרְמְיָ֔הוּ בַּשָּׁנָה֙ הָרְבִעִ֔ית לִיהוֹיָקִ֧ים בֶּן־יֹאשִׁיָּ֛הוּ מֶ֥לֶךְ יְהוּדָ֖ה לֵאמֹֽר׃

2 כֹּה־אָמַ֥ר יְהֹוָ֖ה אֱלֹהֵ֣י יִשְׂרָאֵ֑ל עָלֶ֖יךָ בָּרֽוּךְ׃

3 אָמַ֙רְתָּ֙ אֽוֹי־נָ֣א לִ֔י כִּֽי־יָסַ֧ף יְהֹוָ֛ה יָג֖וֹן עַל־מַכְאֹבִ֑י יָגַ֙עְתִּי֙ בְּאַנְחָתִ֔י וּמְנוּחָ֖ה לֹ֥א מָצָֽאתִי׃

4 כֹּ֣ה תֹּאמַ֣ר אֵלָ֗יו כֹּ֚ה אָמַ֣ר יְהֹוָ֔ה הִנֵּ֤ה אֲשֶׁר־בָּנִ֙יתִי֙ אֲנִ֣י הֹרֵ֔ס וְאֵ֥ת אֲשֶׁר־נָטַ֖עְתִּי אֲנִ֣י נֹתֵ֑שׁ וְאֶת־כׇּל־הָאָ֖רֶץ הִֽיא׃

5 וְאַתָּ֛ה תְּבַקֶּשׁ־לְךָ֥ גְדֹל֖וֹת אַל־תְּבַקֵּ֑שׁ כִּ֡י הִנְנִי֩ מֵבִ֨יא רָעָ֤ה עַל־כׇּל־בָּשָׂר֙ נְאֻם־יְהֹוָ֔ה וְנָתַתִּ֨י לְךָ֤ אֶֽת־נַפְשְׁךָ֙ לְשָׁלָ֔ל עַ֥ל כׇּל־הַמְּקֹמ֖וֹת אֲשֶׁ֥ר תֵּלֶךְ־שָֽׁם׃ פ

פירוש רש"י על ירמיהו מ״ה

1 וּמְנוּחָה לֹא מָצָאתִי. לֹא שָׁרְתָה עָלַי שְׁכִינָה לְהִנָּבֵא; כְּמוֹ ״וַתָּנַח עֲלֵיהֶם הָרוּחַ״ במדבר יא:כו. מָה נִשְׁתַּנֵּיתִי מִתַּלְמִידֵי הַנְּבִיאִים: יְהוֹשֻׁעַ שִׁמֵּשׁ אֶת מֹשֶׁה – נָחָה עָלָיו רוּחַ הַקֹּדֶשׁ; אֱלִישָׁע שִׁמֵּשׁ אֶת אֵלִיָּהוּ – נָחָה עָלָיו רוּחַ הַקֹּדֶשׁ; אֲנִי – מָה נִשְׁתַּנֵּיתִי? מכילתא בא פסחא א

2 וְאֶת כָּל הָאָרֶץ. הִיא הַנִּדּוֹנֶת בִּנְתִישָׁה וַהֲרִיסָה זוֹ:

3 תְּבַקֵּשׁ לְךָ גְדֹלוֹת. נְבוּאוֹת, כְּמוֹ ״סַפְּרָה נָא לִי אֵת כָּל הַגְּדֹלוֹת וְגוֹ׳״ מלכים ב ח:ד, ״קְרָא אֵלַי וְאַגִּידָה לְךָ גְּדֹלוֹת וְגוֹ׳״ ירמיה לג:ג. אָמַר לוֹ הַקָּדוֹשׁ בָּרוּךְ הוּא: אִם אֵין כֶּרֶם אֵין סְיָג, וְאִם אֵין צֹאן אֵין רוֹעֶה; אֵינִי נִגְלֶה עַל הַנְּבִיאִים אֶלָּא בִּזְכוּתָם שֶׁל יִשְׂרָאֵל. כָּךְ שְׁנוּיָה בַּמְּכִילְתָּא בִּתְחִלָּתָהּ מכילתא בא פסחא א:

« רש"י על ירמיהו מ״ד:ל׳ רש"י על ירמיהו מ״ו:ג׳ »